Чолпон-Атадагы кеңешмеде өлкөдөгү негизги маселелер талкууланды
30-июнда Чолпон-Ата шаарында президент Садыр Жапаров облустардагы ыйгарым укуктуу өкүлдөрү, Бишкек жана Ош шаарларынын мэрлери, укук коргоо жана сот органдарынын жетекчилери менен кеңешме өткөрдү.
Жолугушууда мамлекет башчы айыл башчыларына муниципалдык кызматчы макамын берүү боюнча мыйзам кабыл алынганын, ошондой эле президенттин облустардагы өкүлдөрүн, акимдерди жана мэрлерди жылына кеминде эки жолу калк менен жолугушуу өткөрүүгө милдеттендирген мыйзамды Жогорку Кеңеш жактырганын айтты.
Мындан тышкары, акимдерди, алардын орун басарларын, мэрлерди жана айыл өкмөт башчыларын тең же төмөн турган кызмат орундарына үч жумуш күнүнүн ичинде сынактан өткөрбөстөн дайындоо тартиби киргизилгенин билдирди.
Президент аймактарды кыдыруу учурунда жер-жерлерде комиссия түзүлүп, бирок айрым маселелерди жергиликтүү бийлик өз убагында чечпей, укук коргоо органдары менен жергиликтүү жетекчилердин ортосундагы макулдашпаган жагдайлардан улам чыр-чатактар ырбап кеткен учурлар бар экенин кошумчалады.
Садыр Жапаров апрелде Ош, июнда Нарын облусун кыдырып, эл менен жолугушканын айтып, тургундар негизинен таза суу, мектеп, бала бакча жетишсиздиги, ошондой эле укук коргоо органдары жана соттук иштерге байланышкан көйгөйлөрдү көтөрүшкөнүн белгиледи.
