Кыргызстан-Казакстан: элчилик имараттары 49 жылга акысыз пайдаланууга берилет
Казакстандын Сенаты Кыргызстан менен дипломатиялык өкүлчүлүктөрдүн ишин камсыздоого багытталган макулдашууну күчүнө киргизди. Бул тууралуу Казакстандын парламентинин расмий сайтында жарыяланды.
Документке ылайык, эки өлкө бири-бирине элчиликтерди жана элчилердин резиденцияларын жайгаштыруу үчүн жер тилкелерин жана имараттарды 49 жылга акысыз пайдаланууга берет.
Макулдашуу 2025-жылдын 22-августунда Бишкекте түзүлгөн. Казакстанда документ алгач Мажилисте жактырылып, эми Сенаттын колдоосуна ээ болду. Кыргызстанда болсо аны Жогорку Кеңеш 2026-жылдын январында жактырып, кийин президент Садыр Жапаров мыйзамга кол койгон.
Белгиленгендей, Бишкек шаарында Казакстандын элчилиги үчүн 0,75 гектар жер тилкеси жана элчинин резиденциясы үчүн 531,66 чарчы метр менен ага чектеш 0,17 гектар жер бөлүнөт.
Өз кезегинде Кыргызстанга Астана шаарынан элчилик үчүн 0,74 гектар жер тилкеси, ошондой эле элчинин резиденциясы үчүн аянты 1 267,8 чарчы метр жана ага жанаша жайгашкан 0,125 гектар жер пайдаланууга берилет.
Макулдашууда мөөнөтү аяктагандан кийин узартылышы мүмкүн экени да белгиленген. Ошондой эле берилген мүлк эки өлкөдө тең салыктардан жана жыйымдардан бошотулат.
Ошол эле учурда имараттарды куруу, оңдоо, күтүү жана коммуналдык кызматтарга байланыштуу бардык чыгымдарды ар бир өлкө өзү көтөрөт.
Казакстандын Сенаты бул макулдашуу Кыргызстан менен Казакстандын дипломатиялык өкүлчүлүктөрүнүн иштеши үчүн туруктуу жана өз ара пайдалуу шарттарды түзүүгө өбөлгө болорун белгиледи.
