Кыргызстан менен Германия калкты иш менен камсыздоону талкуулашты
2-июлда Эмгек, социалдык камсыздоо жана миграция министринин биринчи орун басары Камчыбек Досматов Германиянын Мекленбург – Алдыңкы Померания федералдык жеринин Экономика, инфраструктура, туризм жана эмгек министрлигинин статс-катчысы Йохен Шульте менен жолугушту.
Министрликтин басма сөз кызматы билдиргендей, жолугушууда тараптар эмгек рыногундагы мамлекеттик саясаттын негизги багыттарын, ошондой эле эмгек миграциясы жаатындагы эл аралык жана эки тараптуу кызматташуунун орчундуу маселелерин талкуулашты.
Ошондой эле эмгек миграциясын жөнгө салуу, калкты иш менен камсыз кылууга көмөктөшүү жана жарандарды уюшкан түрдө чет өлкөлөргө ишке орноштуруу механизмдерин өнүктүрүү боюнча тажрыйба алмашууга өзгөчө көңүл бурулду.
Жолугушуунун соңунда тараптар эмгек тармагындагы өнөктөштүктү мындан ары да бекемдөөгө жана эки тараптуу кызматташууну кеңейтүүгө кызыкдар экенин белгилешти.
