Кыргызстан менен Германия парламенттер аралык кызматташууну талкуулашты
3-июнда Министрлер кабинетинин төрагасы Адылбек Касымалиев Германиянын парламентинин “Борбор Азия – Германия” достук тобунун депутаттары менен жолукту. Бул тууралуу өкмөттүн басма сөз кызматы билдирди.
Жолугушуу Бишкектеги “Ынтымак Ордо” имаратында өтүп, анда тараптар эки тараптуу жана аймактык кызматташтык маселелерин кеңири талкуулашты.
Адылбек Касымалиев Германия Европа Биримдигиндеги Кыргызстандын негизги өнөктөштөрүнүн бири экенин белгилеп, эки өлкөнүн мамилелери саясий ишенимге жана аймактагы туруктуулукка болгон өз ара кызыкчылыкка негизделгенин айтты.
Ошондой эле Министрлер кабинетинин төрагасы Кыргызстандагы туруктуу экономикалык өнүгүү, бизнес-чөйрөнү жакшыртуу, административдик жол-жоболорду жөнөкөйлөтүү жана мамлекеттик кызматтарды санариптештирүү боюнча жүргүзүлүп жаткан реформалар тууралуу маалымат берди.
Адылбек Касымалиев Германиялык бизнес өкүлдөрүнүн Кыргызстанга болгон кызыгуусу өсүп жатканын белгилеп, агроөнөр жай, өндүрүш жана өнөр жай тармактарында ийгиликтүү ишке ашып жаткан долбоорлорго токтолду.
Германиялык тарап Кыргызстанды БУУнун Коопсуздук Кеңешинин туруктуу эмес мүчөлүгүнө шайланышы менен куттуктап, өлкөдөгү акыркы жылдардагы өнүгүү жана реформаларга жогорку баасын берди.
Жолугушуунун жыйынтыгында тараптар кызматташууну мындан ары тереңдетүүгө жана парламенттер аралык байланыштарды чыңдоого даяр экенин билдиришти.
