Кыргызстан менен Индонезия экономикалык кызматташтыкты бекемдейт
Кыргызстандын тышкы иштер министри Жээнбек Кулубаев Индонезиянын тышкы иштер министринин орун басары Анис Маттаны кабыл алды.
Тышкы иштер министрлигинин басма сөз кызматы билдиргендей, 2-июлда өткөн жолугушууда тараптар саясий диалогду чыңдоо, жогорку деңгээлдеги өз ара сапарларды уюштуруу, келишимдик-укуктук базаны кеңейтүү жана эл аралык аянтчалардагы өз ара макулдашылган кызматташтыкты жакшыртуу боюнча пикир алышты.
Жээнбек Кулубаев Кыргызстан Индонезияны Азия-Тынч океан аймагындагы маанилүү жана достук өнөктөш катары көрөрүн белгилеп, соода-экономикалык, инвестициялык, туристтик, маданий-гуманитардык тармактардагы жана адал-индустриясы боюнча долбоорлорду өнүктүрүүнүн зарылдыгын айтты.
Өз кезегинде Анис Матта Индонезия кыргыз тарап менен мазмундуу диалогду улантууга, экономикалык байланыштарды өнүктүрүүгө, бизнес чөйрөлөрдүн кызматташтыгын кеңейтүүгө жана маданий-гуманитардык алакаларды бекемдөөгө даяр экенин билдирди.
Жолугушуунун соңунда эки тарап тең кыргыз-индонезиялык достук мамилелерди мындан ары бекемдөөгө жана эки тараптуу кызматташтыкты системалуу нукта өнүктүрүүгө кызыкдар экенин ырасташты.
