Кыргызстан Австрияда тоолуу аймактарды өнүктүрүү маселелерин көтөрдү
Кыргызстандын делегациясы Австрияда тоолуу аймактарды туруктуу өнүктүрүү маселелери боюнча бир катар жолугушууларды өткөрдү. Бул тууралуу президенттин админстрациясы билдирди.
Вена шаарында өткөн "Тоолуу аймактарды туруктуу өнүктүрүү үчүн эл аралык тоо күн тартибин илгерилетүү" аттуу тегерек үстөлдө тоо экосистемаларын коргоо, эл аралык кызматташтыкты кеңейтүү жана биргелешкен демилгелерди ишке ашыруу маселелери талкууланды.
Иш-чарага Кыргызстандын президентинин тоолуу аймактарды өнүктүрүү боюнча аракеттердин беш жылдыгын ишке ашыруу боюнча атайын өкүлү Динара Кемелова, БУУнун, Европадагы коопсуздук жана кызматташтык уюмунун, Австриянын жана башка өлкөлөрдүн өкүлдөрү катышты.
Кыргыз тарап 2027-жылы Бишкекте өтө турган Экинчи Глобалдык Тоо саммитине даярдык тууралуу маалымат берип, эл аралык өнөктөштөрдү катышууга чакырды.
Иш сапардын алкагында Динара Кемелова Австрия парламентинин спикери Вальтер Розенкранц, ЕККУнун башкы катчысы Феридун Синирлиоглу жана башка өкүлдөр менен жолугушуп, тоолуу аймактарды өнүктүрүү багытындагы кызматташууну талкуулады.
