Түптө жергиликтүү башкаруу боюнча республикалык жыйын өтүп жатат
Ысык-Көл облусунун Түп районунда жергиликтүү өз алдынча башкаруунун 35 жылдыгына арналган республикалык семинар-кеңешме өтүп жатат.
Иш-чара "Жергиликтүү өз алдынча башкарууга 35 жыл – Уңгужол жамааттардын демилгеси жана өнүгүүнүн келечеги" деген аталышта Мамлекеттик кызмат жана жергиликтүү өз алдынча башкаруу иштери боюнча мамлекеттик агенттик тарабынан уюштурулган.
Семинардын алкагында катышуучулар Ысык-Көл айыл аймагындагы жергиликтүү өз алдынча башкаруунун тажрыйбалары менен таанышып, кол өнөрчүлүк буюмдарынын, маданий баалуулуктардын, айыл чарба жана коммуналдык техникалардын, ошондой эле инфраструктуралык долбоорлордун көргөзмөлөрүнө күбө болушууда.
Мындан тышкары, катышуучулар арасында "Улуттук дем – дүйнөлүк бийиктик" уңгужол жарлыгынын алкагында "Акыл Майдан" интеллектуалдык долбоору өткөрүлүүдө.
Иш-чарага Министрлер кабинетинин төрагасынын орун басары Улан Маматканов, Мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Элчибек Жантаев, президенттин Ысык-Көл облусундагы ыйгарым укуктуу өкүлү Бакытбек Жетигенов жана башка өкүлдөр катышууда.
Семинар-кеңешменин жүрүшүндө жергиликтүү өз алдынча башкаруунун өнүгүү жолу, жергиликтүү жамааттардын демилгелери, мыкты тажрыйбалар жана аймактарды өнүктүрүүнүн келечектүү багыттары талкууланууда.
