Дипломатиялык мекемелердин аткарган иштерине баа берилди
10-июлда Тышкы иштер министрлигинде 2026-жылдын биринчи жарым жылдыгындагы ишмердүүлүктүн жыйынтыгына арналган жыйын өттү.
Маалыматка ылайык, жыйында министрликтин борбордук аппаратынын түзүмдүк бөлүмдөрүнүн жетекчилери аткарган иштер жана чет өлкөлөрдөгү дипломатиялык мекемелердин ишмердүүлүгүнүн жыйынтыктары тууралуу маалымат беришти.
Министр Жээнбек Кулубаев дипломатиялык кызмат органдарынын жалпы ишине баа берип, Кыргызстандын тышкы саясатынын негизги багыттары боюнча жүргүзүлүп жаткан иштердин системалуу мүнөздө экенин белгиледи.
Ал өткөн жарым жылдык жигердүү дипломатиялык аракеттердин мезгили болгонун айтып, Кыргызстандын 2027–2028-жылдарга БУУнун Коопсуздук кеңешинин туруктуу эмес мүчөсү болуп шайланышын өлкөнүн көп жылдык тышкы саясий аракеттеринин маанилүү жыйынтыгы катары баалады.
Ошондой эле министрлик айрым чет өлкөлүк мекемелердин жетекчилерине карата сын-пикирин билдирип, санкциялык чектөөлөрдү алып салуу жана экономикалык дипломатия багыттарындагы иштерди күчөтүү зарылдыгын белгиледи.
Коллегиянын жыйынтыгында Кыргызстандын БУУнун Коопсуздук кеңешиндеги ишмердүүлүгүнө сапаттуу даярдык көрүү, ШКУнун Бишкек саммитин жана VI Дүйнөлүк көчмөндөр оюндарын ийгиликтүү өткөрүү, ошондой эле өлкөнүн кызыкчылыгы үчүн чет мамлекеттер менен эки тараптуу жана көп тараптуу кызматташтыкты мындан ары өнүктүрүү багыттары белгиленди.
