Кыргызстан менен АКШ бажы кызматташтыгын күчөтүүнү көздөйт
10-июлда Мамлекеттик бажы кызматынын төрагасы Алмаз Салиев менен Американын Кыргызстандагы элчиси Лесли Вигери жолугушту.
Бажы кызматы белгилегендей, жолугушууда тараптар мыйзамсыз жүк ташууга каршы күрөшүү, маалымат алмашуу, экспорттук көзөмөлдү күчөтүү жана бажы кызматтарынын ортосунда түз байланыштарды өнүктүрүү маселелерине көңүл бурушту.
Кыргыз тарап радиациялык көзөмөл каражаттарын жаңылоо, адистерди даярдоо жана заманбап технологияларды киргизүү багытында кызматташууга кызыкдар экенин билдирди.
Ошондой эле жолугушууда бажы кызматын санариптештирүү, тобокелдиктерди башкаруу системаларын өнүктүрүү жана эл аралык сооданын коопсуздугун камсыз кылуу багыттары талкууланды.
Тараптар мындан ары да өз ара пайдалуу кызматташууну улантууга даяр экенин белгилешти.
