Кыргызстан тоо-кен тармагына чет өлкөлүк инвестиция тартуу боюнча меморандумга кол койду

Инвестициялар боюнча улуттук агенттик менен "Alvarez & Marsal Kazakhstan" компаниясы Кыргызстанга чет өлкөлүк инвестицияларды тартуу жаатындагы кызматташтыкты өнүктүрүү боюнча меморандумга кол коюшту.

Улуттук агенттиктин маалыматына ылайык, меморандумдун негизги максаты – өнөктөштүк мамилелерди өнүктүрүү жана тоо-кен тармагына, стратегиялык мааниге ээ минералдык ресурстарды өздөштүрүү, казып алуу жана кайра иштетүү боюнча долбоорлорго узак мөөнөттүү инвестицияларды тартуу.

Документтин алкагында АКШдан, Европа Биримдигине мүчө мамлекеттерден, Жапониядан жана башка өлкөлөрдөн инвесторлорду тартуу боюнча биргелешкен иштер жүргүзүлөт.

Тараптардын белгилешинче, меморандумга кол коюу эл аралык кызматташууну кеңейтүүгө жана Кыргызстандын тоо-кен тармагындагы инвестициялык долбоорлорду ишке ашырууга өбөлгө түзөт.