Италиялык компанияларга “Тамчы” атайын аймагынын мүмкүнчүлүктөрү сунушталды
Инвестициялар боюнча улуттук агенттиктин башчысынын орун басары Мээримбек Койчуманов Италиянын Тышкы соода агенттигинин президенти Маттео Зоппас жана айыл чарба техникаларын өндүрүүчүлөр федерациясынын президенти Мариятереза Маскио менен жолукту.
Мекемеден билдиришкендей, жолугушууга ITA, FederUnacoma, Италиянын Казакстандагы элчилиги жана Кыргызстандагы Ардактуу консулдугунун өкүлдөрү катышты.
Тараптар Кыргызстандын мамлекеттик инвестициялык саясатынын артыкчылыктуу багыттарын жана эки өлкөнүн ортосундагы кызматташтыкты өнүктүрүү жолдорун талкуулашты.
Айрыкча айыл чарба техникаларын өндүрүү, айыл чарба өндүрүмүн кайра иштетүү, курулуш материалдарын жана эмерек чыгаруу, медицина багыттарындагы биргелешкен долбоорлорду ишке ашыруу мүмкүнчүлүктөрүнө көңүл бурулду.
Ошондой эле италиялык компаниялар үчүн Ысык-Көл облусунун жана "Тамчы" атайын финансылык-инвестициялык аймагынын мүмкүнчүлүктөрү боюнча маалымат берилди.
Жолугушуунун жыйынтыгында тараптар инвестициялык байланыштарды чыңдоо, биргелешкен долбоорлорду ишке ашыруу жана италиялык бизнес өкүлдөрүнүн катышуусундагы иш-чараларды уюштуруу боюнча кызматташууну улантууга макулдашышты.
