Кыргызстан жана Беларусь айыл чарба тармагындагы өнөктөштүктү бекемдейт
Суу ресурстары, айыл чарба жана кайра иштетүү өнөр жайы министринин биринчи орун басары Илич Марсбек уулу Беларустун Кыргызстандагы атайын жана ыйгарым укуктуу элчиси Сергей Молунов менен жолугушту.
Министрликтин басма сөз кызматы билдиргендей, жолугушууда агроөнөр жай тармагындагы эки тараптуу кызматташтыкты өнүктүрүү жана Беларустун премьер-министри Александр Турчиндин Кыргызстанга болгон расмий сапарынын алкагында жетишилген макулдашууларды ишке ашыруу маселелери талкууланды.
Тараптар айыл чарба өндүрүмдөрүн кайра иштетүү, картөшкө өстүрүү жана аны кайра иштетүү, эт-сүт багытындагы мал чарбачылыгы жана үрөнчүлүк тармактарындагы кызматташуунун келечегин карашты.
Жолугушуунун жыйынтыгында тараптар агрардык тармактагы биргелешкен долбоорлорду ишке ашырууга жана өз ара кызматташтыкты мындан ары да бекемдөөгө даяр экендиктерин билдиришти.
