Маданият, маалымат, спорт жана жаштар саясаты министри канча айлык аларын ачыктады
14-июлда Маданият министри Мирбек Мамбеталиев “Ачык кабинет” жыйынында өзүнүн айлыгынын өлчөмүн ачыктады.
"Менин айлыгым — 100 000 сомду түзөт. Бул — мен ай сайын колума алган сумма. Ага бардык кошумча төлөмдөр жана иш тажрыйбасы үчүн үстөк акылар кирет. Ошондой эле мамлекеттик мекемелердеги кызматкерлер үчүн стимулдаштыруу фонду бар, андан биз ай сайын болжол менен 50% өлчөмүндө кошумча төлөм алабыз", – деди министр.
Мамбеталиевдин айтымында, анын орун басарлары 70 000 сом алышат. Бул тармактагы кызматкерлердин орточо айлыгы болжол менен 40 000 сомду түзөт.
«Айлык акы 100%га көтөрүлгөндөн кийин, музей жана китепкана кызматкерлеринин минималдуу эмгек акысы 33 000 сомго жетти. Мындан тышкары, кызматкерлерге стимул берүү жана эмгек акыны жогорулатуу үчүн биз атайын эсептерге которулган каражаттын 70%ын финансылык бонус катары бөлүүнү уюштурдук», - деп кошумчалады Мирбек Мамбеталиев.
