Түрк тарап Кыргызстанга 116 млн долларлык долбоор сунуштады
Инвестициялар боюнча улуттук агенттиктин башчысы Равшанбек Сабиров Түркиянын «TANFER» компаниясынын өкүлдөрү менен жолукту.
Жолугушууда Кыргызстан менен Түркиянын ортосундагы инвестициялык кызматташтыкты кеңейтүү жана биргелешкен долбоорлорду ишке ашыруу маселелери талкууланды.
Түркиялык өкүлдөр Кыргызстанда улуттук биокоопсуздук программасын ишке ашыруу боюнча инвестициялык сунушун тааныштырды.
Маалыматка ылайык, долбоордун жалпы наркы 116,3 млн долларды түзөт. Демилге ишке ашса 1 600гө чейин адам жумуш менен камсыз болору айтылды.
Зарыл болгон инфраструктураны куруу, жабдуу чыгымдарын инвестор каржылары белгиленди.
Жолугушуунун жыйынтыгында долбоорду ишке ашыруу мүмкүнчүлүктөрүн тиешелүү мамлекеттик органдардын катышуусунда биргелешип кароо боюнча макулдашылды.
