Садыр Жапаров ШКУ өлкөлөрүнүн тышкы иштер министрлери менен жолугушту
Мамлекет башчысы Садыр Жапаров 24-июлда Чолпон-Ата шаарында Шанхай кызматташтык уюмуна мүчө мамлекеттердин тышкы иштер министрлери менен жолугушту. Бул тууралуу президенттин админстрациясы билдирди.
Жолугушууда ШКУ алкагындагы коопсуздук, экономикалык кызматташтык жана уюмдун мындан аркы өнүгүүсү талкууланды.
Мамлекет башчысы терроризм, экстремизм, баңгизаттарды мыйзамсыз жүгүртүү жана трансулуттук кылмыштуулук сыяктуу коркунучтарга каршы биргелешкен аракеттерди күчөтүү зарылдыгын белгиледи.
Ошондой эле Садыр Жапаров Бишкекте трансулуттук уюшкан кылмыштуулукка каршы аракеттенүү борборун түзүү жана коопсуздук багытындагы кызматташууну кеңейтүү боюнча демилгелерди айтты.
Президент ШКУнун 25 жылдык тарыхында маанилүү аянтчага айланганын белгилеп, уюмдун алкагында соода-экономикалык байланыштарды, транспорттук каттамдарды жана инвестициялык долбоорлорду өнүктүрүү зарылдыгына токтолду.
Жолугушууга ШКУга мүчө мамлекеттердин тышкы иштер министрлери жана уюмдун жетекчилиги катышты.
