Садыр Жапаров мектептердеги китеп маселесин чечүүгө Жарлыкка кол койду

Кыргызстанда көп жылдан бери чечилбей келген окуу китептеринин жетишсиздиги жана сапаты боюнча чечкиндүү кадам жасалды. Президент Садыр Жапаров "Жалпы билим берүү уюмдарын окуу китептери менен камсыздоо боюнча кечиктирилгис чаралар жөнүндө" Жарлыкка кол койду.

Документке ылайык, бул максатка мамлекеттик бюджеттен 8 миллиард 500 миллион сом каралат. Бул соңку жылдардагы билим берүү тармагына бөлүнгөн эң ири суммалардын бири.

Президенттин администрациясы билдиргендей, өлкө башчысынын тапшырмасы менен министрлер кабинети атайын мамлекеттик программа иштеп чыгышы керек.

Анын алкагында:

• Жаңы окуу программаларын жана китептерди түзө турган ведомстволор аралык комиссия түзүлөт;

• Бардык китептер заманбап талаптарга жана билим берүү стандарттарына жооп береби деп текшерилет;

• Авторлор ачык сынак менен тандалат;

• Эң негизги жаңылык - ар бир китепке уникалдуу QR-код чапталат. Ошентип китеп кайсы басмаканадан чыгып, кайсы районго, кайсы мектепке, кайсы окуучуга жеткенине чейин онлайн көзөмөлдөнөт.

Бул система китептердин ортодон жоголуп кетишине, бир мектепке ашыкча барып, экинчисине жетпей калышына бөгөт коёт.

Бийлик бул чаралар билим сапатын көтөрүп, ар бир окуучу заманбап китеп менен камсыздалат деп ишендирүүдө.