Равшанбек Сабиров: Кыргызстан инвесторлор үчүн жагымдуу шарттарды түзүүдө
Инвестициялар боюнча улуттук агенттиктин башчысы Равшанбек Сабиров Кыргыз-Россия VIII экономикалык форумунун алкагында өткөн "Кыргызстан менен Россиянын аймактарынын соода-экономикалык жана инвестициялык кызматташуусу. Мыкты долбоорлордун бет ачары" аталышындагы тегерек үстөлгө катышты.
Аталган агенттиктин басма сөз кызматы билдиргендей, иш-чарага эки өлкөнүн экономикалык багыттагы министрликтеринин, мамлекеттик органдарынын, аймактык бийлик өкүлдөрүнүн, өнүктүрүү институттарынын жана бизнес-коомчулуктун өкүлдөрү катышышты.
Равшанбек Сабиров Орусия Кыргызстан үчүн негизги соода-экономикалык жана инвестициялык өнөктөштөрдүн бири экенин белгиледи. Анын айтымында, аймактар аралык кызматташууну күчөтүү жаңы биргелешкен долбоорлорду ишке ашырууга жана инвестицияларды тартууга шарт түзөт.
Ал ошондой эле Санкт-Петербург эл аралык экономикалык форуму, "Россия – Ислам дүйнөсү: KazanForum", Кыргыз-Россия экономикалык форуму жана Кыргыз-Россия аймактар аралык конференциясы сыяктуу эл аралык аянтчалар эки өлкөнүн кызматташтыгын өнүктүрүүдө маанилүү экенин айтты.
"Кыргызстан инвесторлор үчүн жагымдуу шарттарды түзүү боюнча ырааттуу иш алып барууда. Биз мыйзамдык базаны өркүндөтүп, инвестициялык долбоорлорду коштоонун заманбап санариптик механизмдерин киргизип жатабыз жана аларды ишке ашыруунун бардык этаптарында ар тараптуу колдоо көрсөтүүгө даярбыз", - деди Равшанбек Сабиров.
Белгиленгендей, форумда өнөр жай кооперациясын өнүктүрүү, транспорттук-логистикалык инфраструктураны жакшыртуу, санариптештирүү, агроөнөр жай комплекси жана биргелешкен инвестициялык долбоорлорду ишке ашыруу маселелери талкууланды.
