Кыргызстан менен Кытай гранттык долбоорлорду ишке ашырууну макулдашты
Министрлер кабинетинин төрагасынын орун басары Эрлист Акунбеков Кытайга болгон жумуш сапарынын алкагында Кытайдын Эл аралык өнүктүрүү жана кызматташтык агенттигинин төрагасы Чэнь Сяодун менен жолугушту. Бул тууралуу министрлер кабинетинен билдиришти.
Жолугушууда эки өлкө башчылары жетишкен макулдашуулардын жана биргелешкен долбоорлордун ишке ашырылышы талкууланды. Акунбеков Садыр Жапаров менен Си Цзиньпиндин жолугушуусунда 30дан ашык документке кол коюлганын, эми аларды ишке ашыруу калганын белгиледи.
"Гранттык каражаттардын эсебинен каржыланган долбоорлорду алдыга жылдыруу Кыргызстан үчүн олуттуу социалдык мааниге ээ", - деди ал.
Өз кезегинде Чэнь Сяодун макулдашылган гранттык долбоорлорду ишке ашырууга кызыкдар экенин жана жаңы багыттарда кызматташууга даяр экенин билдирди.
Тараптар айыл чарба, саламаттыкты сактоо, транспорт жана бажы инфраструктурасы, техника менен камсыздоо жана экология жаатындагы долбоорлорду талкуулашты.
Жыйынтыгында гранттык долбоорлор боюнча жумушчу топтун үзгүлтүксүз отурумдарын өткөрүү макулдашылды.
