Кыргыз-өзбек жаш парламентарийлери тажрыйба алмашууну көздөшөт

10-августта Жогорку Кеңештин төрагасы Марлен Маматалиев Кыргызстандын жана Өзбекстандын жаш парламентарийлеринин II форумуна катышты.

"Жаштар – жалпы прогресске жана тынчтыкка карай жолдо!" деген ураан алдында өткөн форумга эки өлкөнүн депутаттары, жаштар, адистер жана коомдук уюмдардын өкүлдөрү катышты.

Марлен Маматалиев кыргыз-өзбек мамилелеринин тарыхый, маданий жана руханий жакындыгын белгилеп, акыркы жылдары эки өлкөнүн ортосундагы кызматташтык жаңы деңгээлге чыкканын айтты.

Анын айтымында, парламенттер аралык байланыштар дагы өнүгүп, эки тараптуу кызматташтыктын маанилүү багытына айланды. Төрага бул жетишкендиктерди жаш муунга өткөрүп, эки өлкөнүн достугун биргелешкен демилгелер аркылуу бекемдөө зарылдыгын белгиледи.

Форумда жаш парламентарийлердин кызматташтыгын туруктуу негизде улантуу, жаштардын коомдук-саясий иштердеги ролун жогорулатуу жана биргелешкен демилгелерди колдоо маселелери талкууланды.

Жыйынтыгында тараптар жаш парламентарийлердин ортосунда тажрыйба алмашууну күчөтүү маанилүү экенин белгилешти.