Дүйнөлүк бажы уюмунун өкүлү “Торугарт” өткөрүү пунктунда болду
Кече Дүйнөлүк бажы уюмунун Башкы катчысы Иэн Сондерс (Ian Saunders) КРнын Мамлекеттик бажы кызматынын төрагасы У.А. Кимсанов менен бирге “Торугарт” автомобилдик өткөрүү пунктунда болду. Бул тууралуу аталаган мекеменин басма сөз кызматынан кабарлашты.
Иш сапардын жүрүшүндө конокторду өткөрүү пунктунун ишмердүүлүгү, инфраструктураны модернизациялоо, бажы жол-жоболорун санариптештирүү жана өткөрүү жөндөмдүүлүгүн жогорулатуу боюнча жүргүзүлүп жаткан иштер менен жакындан тааныштырышты.
Маалыматка караганда, Иэн Сондерс мырза “Смарт Бажы” санариптик экосистемасына, заманбап техникалык көзөмөл каражаттарын колдонууга, электрондук кезекке жана кыргыз-кытай багытында “Акылдуу чек ара” концепциясын өнүктүрүү келечегине өзгөчө көңүл бурду.
Иш сапардын алкагында Кыргыз Республикасынын бажы администрациясын өркүндөтүү, чек арадан өтүү жол-жоболорунун натыйжалуулугун жогорулатуу жана товарлардын өтүүсүн тездетүү үчүн шарттарды түзүү багытында жетишилген натыйжалар көрсөтүлдү.
Ушул эле күнү Дүйнөлүк бажы уюмунун өкүлү үчүн Мамлекеттик бажы кызматынын контролдук-аналитикалык инструменттеринин презентациясы уюштурулду.
Билдирүүгө караганда, Мамлекеттик бажы кызматынын жана “Бирдиктүү терезе» мамлекеттик ишканасынын өкүлдөрү конокту бажы операцияларын талдоо жана контролдоо үчүн колдонулган маалыматтык системалардын мүмкүнчүлүктөрү менен тааныштырып, таргет-борбордун ишин көрсөтүштү.
