Майыптыгы бар жергиликтүү кеңештердин депутаттары ЖКте болушту
Кыргызстанда майыптыгы бар 52 адам жергиликтүү кеңештердин депутаты болуп иштеп жатат. Алардын 22си өлкөнүн жети облусунан Бишкекке келип, биринчи жолу Жогорку Кеңеште уюштурулган жолугушууга катышышты. Бул тууралуу депутат Дастан Бекешов билдирди.
Анын айтымында, жолугушууда жергиликтүү кеңештердин депутаттары өз аймактарындагы көйгөйлөрдү көтөрүштү. Парламент төрагасы Марлен Маматалиев айтылган маселелер мыйзам долбоорлорун, өзгөчө республикалык бюджетти кароодо эске алынарын билдирди.
Бекешовдун билдирүүсүнө караганда, 2021-жылы шайлоо мыйзамдарына өзгөртүүлөрдү киргизүү демилгеленип, жергиликтүү кеңештерге шайлоодо майыптыгы бар адамдар үчүн квота берүү каралган.
Бул өзгөртүүлөр майыптыгы бар жарандардын жергиликтүү бийлик органдарында өкүлчүлүгүн камсыздоого жана чечим кабыл алуу процессине катышуусуна мүмкүнчүлүк түзгөн.
Бүгүнкү күндө алар өз шайлоочуларынын кызыкчылыгын коргоп, аймактардагы көйгөйлөрдү өлкө парламентинин деңгээлинде көтөрүп жатышат.
