Александр Бочкин: "Санариптик кызматкерлер менен жасалма интеллект бизнес процессти 10-12 эсе ылдамдатат"
Процесстик аналитика технологиясын, жасалма интеллект жана санариптик кызматкерлерди колдонуу компанияларга бизнес-процесстерди бир нече эсеге ылдамдатууга жана чыгымдарды кыскартууга мүмкүнчүлүк берерин Operavix компаниясынын негиздөөчүсү Александр Бочкин Бишкекте өтүп жаткан ProcessTech X Kyrgyzstan процесс аналитикасына арналган биринчи конференцияда билдирди.
Анын айтымында, компаниялардагы бизнес-процесстердин көбү маалыматтык системалар аркылуу автоматташтырылганы менен, көптөгөн операциялар дагы деле кол менен аткарылат. Бул процесстердин өздүк наркынын өсүшүнө, операциялардын жай иштешине жана каталардын көбөйүшүнө алып келет.
Компаниянын негиздөөчүсүнүн сөзүнө караганда, эң чыгымдуу жана түйшүктүү участокторду аныктоо үчүн Task Mining технологиясы колдонулат. Иштөөчү станцияларга атайын модулдар орнотулуп, кызматкерлердин иш-аракеттери жана аларга кеткен убакыт автоматтык түрдө жазылып турат. Ушул маалыматтардын негизинде бизнес-операцияларынын шаблондору түзүлөт жана система кайсы процесстерди автоматташтыруу эң пайдалуу экенин аныктайт.
“Маалыматтарды чогултуу башталгандан эки жуманын ичинде компания бардык операциялардын толук сүрөтүн, алардын бөлүмдөр боюнча наркын жана автоматташтыруунун мүмкүн болгон экономикалык натыйжасын көрө алат”, — деп белгиледи ал.
Компаниянын маалыматына караганда, санариптик кызматкерлерге негизделген чечимдер банк секторунда, курулушта, сатып алууларда жана IT тармагында активдүү колдонулуп жатат. Айрыкча, каржы уюмдарында регуляторлордон келген сурамдарды иштетүү, капиталдык курулушту текшерүү, көп томдуу сметалык документтерди талдоо жана төлөм мөөнөттөрүн көзөмөлдөө автоматташтырылган.
“Кээ бир учурларда документтерди иштетүү ылдамдыгы дээрлик 12 эсеге жогорулады”, — деди ал.
Ошондой эле жасалма интеллект кадрларды тандоодо — техникалык маектешүүлөрдү талдоодо, талапкерлердин кесипкөйлүк көндүмдөрүн баалоодо жана HR-бөлүмдөрү үчүн сунуштарды түзүүдө колдонулат.
Александр Бочкин мындай технологиялар компанияларга операциялык чыгымдарды азайтууга, кызмат көрсөтүүлөрдүн сапатын жогорулатууга, ал эми мамлекеттик сектордо — жарандардын арыз-даттанууларынын санын кыскартууга мүмкүнчүлүк берерин кошумчалады.
