Кыргызстандын Түштүк Кореядагы элчиси Аида Исмаилова Е-7 визасы бар кыргызстандыктарды мамлекеттик социалдык камсыздандыруу жана пенсиялык камсыздоо жөнүндө макулдашууну түзүү мүмкүнчүлүгүн карап чыгууну сунуштады. Бул тууралуу Тышкы иштер министрлиги билдирди.

Маалыматка ылайык, 2023-жылдын 7-июлунда Сеулда элчи Аида Исмаилова Кореянын эмгек жана ишке орноштуруу Министри Ли Чжон Сик мырза менен жолугушту.

Элчи кыргызстандыктарды ишке орноштуруу боюнча иштерди активдештирүүнүн маанилүүлүгүн белгилеп, Кыргызстанга бөлүнгөн квоталарды толук пайдалануу үчүн эмгек келишимдерин көбөйтүү зарылдыгын билдирди. Элчи ошондой эле Е-7 визасы бар кыргызстандыктарды мамлекеттик социалдык камсыздандыруу жана пенсиялык камсыздоо жөнүндө макулдашууну түзүү мүмкүнчүлүгүн карап чыгууну сунуштады.

Өз кезегинде Ли Чжон Сик мырза Кыргызстандын ишке орношуу жаатындагы жетишкендиктерин тааныгандыгын жана бул жаатта эки өлкөнүн ортосундагы кызматташтыкты тереңдетүүнүн маанилүүлүгүн, ошондой эле кыргыз тараптын сунуштарын карап чыгууга даяр экендигин баса белгиледи.