Курулуш тармагында иштеген чет элдиктерди каттоо көзөмөлгө алынат
Курулуш, архитектура жана турак жай-коммуналдык чарба министри Нурдан Орунтаев Ички иштер министрлигинин жана башка укук коргоо органдарынын өкүлдөрү, курулуш компанияларынын жетекчилери менен жумушчу жыйын өткөрдү.
Министрликтен билдиришкендей, жыйындын жүрүшүндө курулуш объектилеринде эмгектенип жаткан чет элдик жарандарды каттоо, алардын мыйзам талаптарын сактоосу жана коомдук коопсуздукту камсыздоо маселелери каралды.
Тараптар чет өлкөдөн келген жумушчулардын документтерин мыйзамга ылайык тариздөө, аларды өз убагында каттоодон өткөрүү жана мамлекеттик органдар менен тыгыз кызматташуу зарылдыгын талкуулашты.
Мындан тышкары, курулуш аянтчаларында ички тартипти сактоо, мыйзам бузуулардын алдын алуу боюнча талаптар айтылды.
Нурдан Орунтаев курулуш тармагында мыйзамдуулук жана тартип так сакталышы керектигин белгилеп, курулуш компаниялары чет элдик жумушчулардын документтерин туруктуу көзөмөлдөп турууга милдеттүү экенин айтты.
Жыйындын соңунда курулуш компанияларынын өкүлдөрүнө көйгөйлөр жаралган учурда ортомчуларга эмес, түздөн-түз мамлекеттик органдарга кайрылуу сунушталып, кооптуу жагдайлар орун алганда 102 кызматына ыкчам маалымат берүү зарылдыгы эскертилди.
