Уюшкан кылмыштуу топторду каржылаган эмес — "Мадина" базарынын ээси Салимовдун адвокаты билдирүү жасады
Жогорку Кеңештин экс-депутаты, Камчы Көлбаевдин уюшкан кылмыштуу тобуна катыштыгы бар деген айып менен камакка алынган "Мадина" базарынын ээси Турсунтай Салимов президент Садыр Жапаровго анын ишин жеке көзөмөлүнө алуу өтүнүчү менен кайрылды. Бул тууралуу Салимовдун жактоочуларынын бири Кайсын Абакиров Фейсбук баракчасында билдирди.
Адвокаттын айтымында, буга чейин ЖМКлар Турсунтай Салимов "колонияларды каржылап, мурдагы жана азыркы криминалдык авторитеттер менен тыгыз байланышта болгон" деген жалган маалымат тараткан.
"Т.А.Салимов эч качан кылмыштуу топтор менен эч кандай байланышы болгон эмес, кылмыштуу топторду каржылоого да катышкан эмес.Ошондой эле биздин кардарыбыздын жашаган жеринен жана иштеген жеринен тинтүү учурунда эч нерсе табылган эмес жана алынган эмес", — деди Кайсын Абакиров.
Жактоочу КР Конституциясына ылайык, "жаранды сот гана күнөөлүү деп таба аларын, адамга негизсиз айып коюуга жол берилбей турганын, айрыкча, кылмыштар боюнча болсо далилдер керек" экенин эскертти.
"Коргоодо биздин кардарыбыздын аракетинде кылмыш жок деп эсептейт жана бул жагдай тергөөнүн жүрүшүндө далилденет", — деп айтылат билдирүүдө.
Жыйынтык сөзүндө адвокат Турсунтай Салимов КР президенти Садыр Жапаровго бул ишти жеке көзөмөлүнө алуу өтүнүчү менен кайрылганын, "анткени чынчыл ишкерлердин кармалышы жана оор кылмыштарды жасаган деген негизсиз айыптоолор республиканын экономикалык өнүгүшүнө терс таасирин тийгизиши мүмкүн" экенин айтат.
Эске сала кетсек, "Мадина" базарынын ээси Турсунтай Салимов уюшкан кылмыштуу топ түзгөн же ага катышкан деген айып менен 7-октябрда УКМКнын кызматкерлери тарабынан кармалган. Мекеменин басма сөз кызматы "Мадина" базарынын ээси уюшкан кылмыштуу топко демөөрчүлүк кылып, анын атаандаштарын коркутуп-үркүтүп жүргөнүн билдирген болчу.
Ишкер Media
