Бишкек – Кант – Токмок жолун оңдоп-түзөө иштери башталат
Транспорт жана коммуникациялар министри Талантбек Солтобаев Чүй облусуна болгон жумушчу сапарынын алкагында Бишкек –Кант унаа жолуна барып, жолдун учурдагы абалы жана транспорт агымы боюнча жүргүзүлүп жаткан иштер менен таанышты. Бул тууралуу Транспорт жана коммуникациялар министрлигинен билдиришти.
Маалыматка ылайык, иш сапардын жүрүшүндө министрге тиешелүү кызматтар тарабынан маалымат берилип, жол кыймылынын коопсуздугун камсыздоо жана тыгындарды азайтуу боюнча аткарылып жаткан иш-чаралар тууралуу баяндалды. Министр жооптуу кызматтарга бир катар тапшырмаларды берди.
Бишкек – Кант унаа жолундагы транспорт тыгынын жоюу максатында жолдун жээги убактылуу кеңейтилди. Мурда эки тилкелүү болгон жол учурда төрт тилкелүү болуп кеңейтилип, атайын материал төшөлүп, тегизделди. Бул иш-чара жолдун өткөрүмдүүлүгүн жогорулатууга багытталган. Ошол эле учурда унаалардын санынын көбөйүшү жана каттамдын интенсивдүүлүгү жогору болгондуктан, тыгындар байкалууда.
Белгилей кетсек, үстүбүздөгү жылдын күз мезгилинде Бишкек – Кант –Токмок унаа жолун толук оңдоп-түзөө иштери башталат.
Мындан тышкары, бүгүнкү күнгө карата республика боюнча жалпы 426 чакырым автожол толугу менен асфальтталды. Бул көрсөткүч өткөн жылдын ушул мезгилине салыштырмалуу 234 чакырымга көп. Тактап айтканда, 2025-жылдын июнь айына карата өлкө боюнча 191,5 чакырым жол асфальтталган.
