Binance`тын кыргызстандык кардарлары 65%га өстү
Кыргызстан криптовалюталарды жана блокчейнди кабыл алуу боюнча алдыңкы өлкөлөрдүн катарында. Бул тууралуу Binance`тын маркетинг боюнча глобалдык директору Рэйчел Конлан журналисттер менен жолугушууда билдирди.
"Жакында криптовалюталар боюнча мыйзамдарга жөнгө салуучу өзгөртүүлөр киргизилип, ал бир топ ийкемдүү жана натыйжалуу болгонун билебиз. Кыргызстан Борбор Азияда криптоадаптация жана криптовалюталарды кабыл алуу боюнча алдыңкы өлкөлөрдүн бири болуп саналат. Акыркы мезгилде Кыргызстандан келген кардарлардын базасы 65%га өстү. Бул укмуштуудай жетишкендик. Бул криптоиндустрияны жана блокчейнди өнүктүрүү үчүн бул жактагы иш-аракеттердин бардыгы жогорку деңгээлде жасалып жаткандыгынын натыйжасы", – деди ал.
Компаниянын аймактык менеджери Кыргызстанда университеттерде оффлайн жана онлайн окутуу программаларын баштоо пландалып жатканын, алгачкы этапта 10 университеттин катышарын, жалпы 60 миң адамга криптовалютанын негиздерин үйрөтүү максатында иш жүрүп жатканын кошумчалады.
Конлан ошондой эле Улуттук банк менен санарип сом жана стабилкоиндер боюнча долбоорлор ишке ашырылып, жергиликтүү колдонуучулар үчүн жеңилдиктер каралып жатканын билдирди.
