Мурдагы банкир малина өстүрүп, чет өлкөгө экспорттой баштады
Руслан Кубанычбеков — буга чейин шаарда банк тармагында иштеп, кийин дыйканчылыкты тандап, ийгиликтүү агробизнесменге айланган кыргыз фермери. Ал учурда малина, дарбыз жана алча өстүрүп, экологиялык жактан таза продукцияларды өндүрүү менен алектенет. Бул тууралуу Айыл чарба министрлигинен билдиришти.
Руслан өзүнүн фермасында биогумус өндүрүү технологиясын иштеп чыгып, аны иш жүзүндө колдонууда. Бул органикалык жер семирткич химиялык заттарга альтернатива катары колдонулуп, түшүмдүүлүктү 20–30%га чейин жогорулаткан. Анын айтымында, биогумустун жардамы менен өстүрүлгөн мөмө-жемиштер сапаты жагынан да жогору болуп, учурда Россияга экспорттолууда.
“Биз үй-бүлөбүз менен биогумус өндүрүүнү баштадык жана толугу менен химиялык жер семирткичтерден баш тарттык. Натыйжада түшүм көбөйүп, сапаты да жакшырып, чет өлкөгө чыга баштадык. Бул ыкманы кошуна чарбалар да колдонуп жатышат. Ошентип, биз өнүгүү менен бирге жаратылышты да сактап калууга болорун далилдедик”, — дейт Руслан Кубанычбеков.
Ошондой эле ал айыл чарбаны келечектин негизги тармагы катары көрөрүн баса белгилеп, жаштарды дыйканчылыкка тартуу маанилүү экенин айтат.
Белгилей кетсек, Руслан Кубанычбеков жакында Венгрияда өткөн Европа комиссиясынын 44-сессиясында айылдык жамааттарды өнүктүрүүгө кошкон салымы үчүн ФАОнун атайын сыйлыгына ээ болду.
