Баткендик дыйкан 200 тонна кулпунай экспорттоп, 34 млн сом киреше тапты
Баткен районунун Жаңы-Жер айылында жашаган дыйкан мамлекеттик фонддун жерин ижарага алып, интенсивдүү ыкма менен кулпунай өстүрүп, ийгиликтүү экспортко чыгарып жатат. Бул тууралуу Айыл чарба министрлигинин басма сөз кызматынан билдиришти.
Өткөн жылы дыйкан 100 тоннадан ашык кулпунай экспорттоп, 17 миллион сом киреше тапса, быйыл көрсөткүчтөр эки эсеге өскөн. Быйыл 200 тоннадан ашык кулпунайды Россия менен Казакстанга экспорттоп, жалпы 34 миллион сомдон ашуун киреше тапкан.
Мындай жогорку жыйынтык 3+2 программасынын алкагында айыл чарба адистеринин көрсөткөн көмөгүнүн аркасында мүмкүн болду. Программа боюнча дыйкандын талаасы атайын анализден өткөрүлүп, өсүмдүктүн керектөөлөрүнө жараша азыктандыруу боюнча так сунуштар берилген. Бул түшүмдүүлүктүн олуттуу жогорулашына өбөлгө түздү.
Ошондой эле бул тажрыйба башка дыйкандар үчүн да үлгү болуп, алар дагы жер анализине негизделген иш ыкмаларын өздөштүрүп, жакшы жыйынтыктарга жетишүүдө.
Министрлик мындай ийгиликтер аймактарда айыл чарба өндүрүшүн өнүктүрүүгө жана экспорттук потенциалды кеңейтүүгө оң таасирин тийгизерин белгиледи.
