Жеңил өнөр жай товарлары ЕАЭБ стандарттарына ылайык көзөмөлдөнөт
Экономика жана коммерция министрлиги жеңил өнөр жай продукцияларына коюлган талаптар буюмдун түрүнө жараша Евразия экономикалык биримдигинин (ЕАЭБ) техникалык регламенттеринде белгиленгенин маалымдайт. Бул тууралуу министрликтин маалымат кызматынан кабарлашты.
Негизги документтердин бири — ТР ТС 017/2011 “Жеңил өнөр жай продукциясынын коопсуздугу жөнүндө” регламенти болуп, анда кийим-кече, бут кийим, текстиль жана башка жеңил өнөр жай товарларына карата коопсуздук талаптары көрсөтүлгөн. Алар материалдардын химиялык курамына, гигиеналык жана физикалык касиеттерине, маркалоо эрежелерине жана шайкештикти ырастоо тартибине байланыштуу талаптарды камтыйт.
Мындан тышкары, продукциянын түрүнө жараша кошумча регламенттер колдонулат:
ТР ТС 007/2011 – балдар жана өспүрүмдөр үчүн арналган продукциялардын коопсуздугу боюнча;
ТР ТС 019/2011 – жеке коргонуу каражаттарынын коопсуздугу боюнча.
Продукциянын коопсуздугу шайкештик жөнүндө декларация же шайкештик сертификаты аркылуу тастыкталат. Сертификат ЕАЭБдин аккредиттелген сертификация органдары тарабынан берилет, ал эми декларация өндүрүүчү же импорттоочу тарабынан катталат. Шайкештиги тастыкталган продукцияга “EAC” белгиси коюлат.
Учурда Экономика жана коммерция министрлигине караштуу Кыргыз аккредитация борбору тарабынан 22 сертификациялоо органы жана 9 сыноо лабораториясы аккредиттелген. Алар тууралуу кеңири маалымат www.kca.gov.kg сайтында жайгаштырылган.
