Кара-Кулжада жүндү кайра иштетүүчү жаңы ишкана ачылды
Бүгүн Ош облусунун Кара-Кулжа районунун Кара-Кулжа айылында жүндү кайра иштетүүгө багытталган жаңы ишкана расмий түрдө ишке кирди. Иш-чарага Суу ресурстары, айыл чарба жана кайра иштетүү өнөр жайы министринин орун басары Бектен Болотбеков катышты. Бул тууралуу Айыл чарба министрлигинин маалымат кызматынан билдиришти.
Ишкана Суу ресурстары, айыл чарба жана кайра иштетүү өнөр жайы министри Бакыт Төрөбаевдин демилгеси менен “30+20+10” программасынын алкагында колдоо тапкан. Гранттык негизде тандалып алынган жеке ишкер Матаева Айгүлгө “Региондорду өнүктүрүү боюнча социалдык өнөктөштүк фонду” тарабынан 3 860 000 сом көлөмүндө пайызсыз кредит берилди.
Каражаттын эсебинен Россиядан өндүрүштүк жабдуулар сатып алынып, ишкана толук комплектацияланды, ал эми жергиликтүү бийлик имаратты камсыз кылды. Ишкана 10 жаңы жумушчу орду менен ишке кирди, бул аймактагы кайра иштетүү тармагын өнүктүрүүгө жана жергиликтүү тургундардын иш менен камсыз болушуна салым кошот.
Ачылыш аземине 100гө жакын адам катышып, Жалал-Абад, Ош жана Чоң-Алай аймактарынан келген ишкерлер менен тажрыйба алмашуу жүргүзүлдү. Жаңы ишкана чакан жана орто ишкердикти өнүктүрүүдө маанилүү кадам катары бааланды.
