Салык кызматы ишкерлер менен бизнес маселелерин талкуулады
Мамлекеттик салык кызматы ишкерлер жана бизнес коомчулуктун өкүлдөрү менен салык мыйзамдарындагы акыркы өзгөртүүлөрдү талкуулоо максатында жолугушуу өткөрдү. Бул тууралуу Салык кызматынан кабарлашты.
Жолугушууга Салык кызматынын төрагасы Алмамбет Шыкмаматов, орун басары Кубанычбек Ысабеков, башкармалыктардын жетекчилери жана адистер катышты.
Төрага өзгөртүүлөрдүн негизги максаты — бизнес үчүн жөнөкөй, ачык жана түшүнүктүү шарттарды түзүү, административдик жүктү азайтуу жана ак ниет салык төлөөчүлөрдү колдоо экенин белгиледи. Алмамбет Шыкмаматов:
«Кабыл алынган өзгөртүүлөр бизнестин ишин жеңилдетүүгө жана ишкердикти өнүктүрүүгө багытталган. Биз ачык диалогго жана пайда болгон маселелерди бирге чечүүгө даярбыз», — деди.
Жолугушуу ачык форматта өтүп, ишкерлер салык саясатын жакшыртуу боюнча суроолорун берип, сунуштарын киргизе алышты.
Мамлекеттик салык кызматы мындай жолугушууларды туруктуу негизде өткөрүп, бизнес менен мамлекеттик органдардын ортосунда ишенимдүү жана натыйжалуу кызматташтыкты бекемдөөнү улантат.
