Ишкерлерге жардам берүүчү “Кыргыз Экспорт” ыкчам штабы иштей баштады
Экономика жана коммерция министрлигинде ишкерлердин кайрылууларына тез жооп берүү жана тигүү-текстиль тармагынын өкүлдөрүнө комплекстүү консультациялык колдоо көрсөтүү максатында “Кыргыз Экспорт” борборунун ыкчам штабы иштей баштады. Бул тууралуу министрликтен маалымдашты.
Ыкчам штаб министрликтин имаратынын биринчи кабатында жайгашып, күн сайын, дем алышсыз саат 9:00дөн 19:00гө чейин иштейт. Ишкерлер бул жерден экспорттук жол-жоболор, продукцияны сертификациялоо жана маркалоо, жаңы рынокторго чыгуу, ишканалардын учурдагы өндүрүш процесстерин уюштуруу жана экспорттук потенциалды жогорулатуу боюнча кеңири консультация ала алышат.
Министрликтин маалыматына ылайык, штабдын негизги максаты — мамлекет менен бизнес ортосундагы түз, ыкчам байланыш түйүнүн түзүү, ишкерлерге түшүнүктүү кадамдар менен багыт берүү жана жаралган маселелерди жедел чечүүгө көмөктөшүү.
Дареги: Абдымомунов көчөсү, 207 (Орозбеков көчөсүнөн кире бериш)
Байланыш борбору: 0550 305 305
