Ала-Бука районунда 5 жылда 51 социалдык объект курулду
Мамлекет башчысы Садыр Жапаров 25-октябрда Жалал-Абад облусуна болгон иш сапарынын жүрүшүндө Ала-Бука районунун 2021–2026-жылдардагы социалдык-экономикалык өнүгүүсүнүн жыйынтыктары жана мындан аркы өнүгүүнүн келечектүү багыттары менен таанышты. Бул тууралуу президенттин администрациясынан кабарлашты.
Маалыматка караганда, Ала-Бука районунда 5 жылда жалпы 51 социалдык жана инфраструктуралык объект пайдаланууга берилди.
Алардын катарында 7 мектеп, 8 бала бакча, 2 оорукана, 2 фельдшердик-акушердик пункт, 2 спорт залы, 3 административдик имарат, музей комплекси, эки эс алуу паркы, 6 кызматтык үй, 2 көпүрө, 2 маданият үйү жана 11 мини-футбол аянтчасы бар.
Учурда Кара-Үңкүр айылында демөөрчүлөрдүн каражатына бала бакча курулууда. Мындан тышкары, 2026-жылдын аягына чейин дагы бир мектепти жана балдар искусство мектебин пайдаланууга берүү пландалууда.
