Таластагы "Айсу" цехи айына 100-150 тоннага чейин сафлор майын өндүрөт
Талас облусунун Айтматов районуна караштуу Жоон-Дөбө айылында жайгашкан “Айсу” сафлор майын өндүрүүчү цех 2023-жылдын 15-августунан тарта ишмердүүлүгүн жолго коюп, бүгүнкү күндө ички рынокто жогорку суроо-талапка ээ сапаттуу май өндүрүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Ишкана сафлор чөбүн Талас жана Чүй облусунун дыйкандарынан 1 килограммын 35–45 сомдон сатып алып, сезондо айына 100–150 тоннага чейин таза продукт чыгарат. Өндүрүлгөн майдын 70–80%ы Талас жана Бишкек шаарларында, калган 30%ы Кыргызстандын башка аймактарында сатылууда.
Сафлор майынын негизги өзгөчөлүгү — анын химиялык кошулмалар кошулбастан, толугу менен таза, муздак ыкма менен сыгылып чыгарылышы. Муздак сыгуу технологиясы майдын табигый даамын, сапатын жана организимге пайдалуу касиеттерин толук сакталып калуусуна шарт түзөт.
Ишкердин айтымында, ички рынокто сафлор майына болгон суроо-талап акыркы мезгилде туруктуу өсүүдө. Бул болсо жергиликтүү өндүрүштү кеңейтүү жана дыйкандар менен кызматташууну мындан ары да бекемдөөгө түрткү болууда.
