Кыргызстанда биринчи жолу финансылык коопсуздук боюнча олимпиада өтөт

11-ноябрынан 13-декабрына чейин Бишкек шаарында мектеп окуучулары үчүн финансы коопсуздугу боюнча биринчи Республикалык олимпиада өткөрүлөт. 

Олимпиаданы БШК, Билим берүү министрлиги жана Финансылык чалгындоо мамлекеттик кызматы жана П.Н. Лебедев атындагы Россия Илимдер академиясынын Физика институтунун мектеп окуучуларын жана студенттерди олимпиадага даярдоо борбору уюштуруп жатат. Иш-чаранын өнөктөштөрү – "Банктар аралык процессинг борбору" ЖАКы менен «ВиЧейндж» ЖЧКсы.

Олимпиаданы уюштуруу жана өткөрүүнүн максаты жаштардын финансылык сабаттуулугун жогорулатуу, шектүү финансылык операцияларды таануу көндүмдөрүн өнүктүрүү жана алдамчылык схемаларына тартылып калуунун алдын алуу.

Олимпиадага Бишкек шаарынын жалпы билим берүүчү мектептеринин 9, 10 жана 11-класстарынын окуучулары чакырылат.

Катышууну каалаган окуучулар 17-ноябрдан 27-ноябрга чейин https://sodrujestvo.org/ дареги боюнча «Содружество» платформасында катталып, 1-декабрдан 3-декабрга чейин тандоо тестинен өтүшү керек.

Эң мыкты 100 окуучу финалдык этапка чакырылат. Жыйынтыктарды жарыялоо жана катышуучуларды сыйлоо 2025-жылдын 13-декабрында бетме-бет форматта өтөт.

Олимпиаданын жеңүүчүлөрү жана байгелүү орундардын ээлери жыл сайын аталган борбор тарабынан өткөрүлүүчү финансылык коопсуздук боюнча жайкы жана кышкы мектептерге катышууга чакырылат.