Кыргызстандын евробонддоруна болгон суроо талап 3 эсеге көбөйдү
Кыргызстандын суверендүү евробонддоруна болгон суроо-талап сунуштан дээрлик 3 эсе көбөйгөнүн бүгүн Министрлер Кабинетинин алдындагы Бизнес жана инвестицияны өнүктүрүү кеңешинин өкүлү Улук Кыдырбаев “Евроблигацияларды чыгаруу: теориядан практикага” аттуу практикалык форумда билдирди.
Анын айтымында, узак мөөнөттүү финансылоону тартуу темасы Борбор Азия өлкөлөрү үчүн барган сайын маанилүү болуп баратат. Анткени регион жаңы экономикалык өнүгүү жана масштабдуу милдеттерди аткаруу этабында турат.
“Пландарды ишке ашыруу үчүн ресурстар керек. Капитал рыногу жана карыз алуу рыногу — өлкөлөрдүн алдыга жылышына шарт түзгөн негизги инструменттердин бири”, — деди Кыдырбаев.
Ал Борбор Азия өлкөлөрү евробонддорду жайгаштырууда ийгиликтүү тажрыйба топтогонун белгиледи. Өзбекстан бул рынокко үзгүлтүксүз чыгып келет, Казакстан 2,5 млрд доллардан ашык суммага евробонддорду чыгарган.
“Биз 700 млн доллар тарттык, ошол эле учурда суроо-талап 2,1 млрд долларды түздү. Бул эл аралык инвесторлордун жогорку кызыгуусун жана ишенимин көрсөтөт”, — деди ал.
Кыдырбаевдин айтымында, мындай динамика өлкөдө жүргүзүлүп жаткан экономикалык саясаттын натыйжалуулугун жана Кыргызстандын дүйнөлүк капитал рыногундагы өсүп жаткан жагымдуулугун тастыктайт.
