Сүттү кайра иштеткен "Жети Баатыр" ишканасы өндүрүшүн кеңейтүүдө
Суу ресурстары, айыл чарба жана кайра иштетүү өнөр жайы министрлигине караштуу Кайра иштетүү жана органикалык айыл чарба департаменти "30+20+10" долбоорунун алкагында сүт азыктарын өндүргөн "Жети Баатыр" ЖЧКсынын ишмердүүлүгү менен таанышты. Бул тууралуу ведомстводон билдиришти.
Ишкана "Айыл сүт" соода маркасы менен жогорку сапаттагы табигый сүт азыктарын өндүрүп келет. Компания сүттү кайра иштетүү тармагында үч жылдан ашуун убакыттан бери туруктуу иш жүргүзүүдө.
Долбоордун алкагында "Жети Баатыр" ЖЧКсы консультациялык жана технологиялык колдоого ээ болуп, өндүрүштү модернизациялоо жана продукциянын сапатын жогорулатуу багытында иш алып барууда. Учурда өндүрүштү кеңейтүү максатында Түркия Республикасынан заманбап жабдуулар сатылып алынды.
Аталган чаралар жаңы жумуш орундарын түзүүгө, аймактын социалдык-экономикалык өнүгүшүнө салым кошууга жана ички рынокту сапаттуу сүт азыктары менен камсыздоого өбөлгө түзөт.
