Кыргызстан спаржасы келечекте Араб өлкөлөрүнө, Европага, Кытайга экспорттолот
Суу, айыл чарба жана кайра иштетүү министрлиги уюштурган "Агродиалог-2026" форумунда "Агроиндустрия" компаниясынын өкүлү Айдар Жолдошбеков соңку 10 жылдан бери спаржа өстүрүп, жакшы ийгиликке жетишкенин билдирди.
"Биздин аз көлөмдө баштаган ишмердүүлүгүбүз бүгүнкү күндө 20 гектардан түшүм алууга жетти. Быйылкы жылга 61 гектар жерге айдоону пландап жатабыз. Салттуу ыкма менен бир гектардан орточо эсеп менен 6–8 тонна түшүм алуу мүмкүнчүлүгү бар. Ал эми заманбап агротехнологиялык ыкмалар аркылуу түшүмдүүлүктү 12–15 тоннага чейин жогорулатса болот",-дейт ал.
Фермердин айтымында, учурда өндүрүлгөн спаржа Казакстан жана Россияга экспорттолот. Мындан тышкары, компания келечекте спаржа продукциясын Араб, Азия өлкөлөрүнө, Түштүк Корея, Гонконг, Кытай, Макао сыяктуу өлкөлөргө экспорттоп баштайт.
"Ошондой эле биз Европа мамлекеттери менен да иштешүүнү пландап жатабыз. Ошого байланыштуу былтыр спаржанын кызыл түрү үчүн эл аралык сапат стандартына жооп берчү GlobalGAP сертификатын алдык",-дейт ал.
