Алматыда курьерлерге талаптар күчөтүлөт
Алматы полициясы курьердик кызмат көрсөтүүчү агрегаторлорго талаптарды күчөтүүнү сунуштады. Бул маселе шаардык полиция департаментинин жыйынында ири сервистердин өкүлдөрү, прокуратура, шаардык кызматтар жана коомчулук катышкан кеңешмеде талкууланганын Informburo.kz жазды.
Жыйынга 2024-жылдын 14-февралындагы окуя себеп болгон. Курьер гүл жеткирип келип, кызга асылууга аракет кылган. Ал жети суткага административдик камакка алынган.
Алматы шаардык полиция департаментинин башчысы Айдын Кабдулдинов ар бир курьер турак жайларга жана жарандардын жеке маалыматтарына кирүү мүмкүнчүлүгүнө ээ экенин белгиледи.
Ушуга байланыштуу полиция төмөнкү катуу талаптарды койду:
- кызматкерлерди иштин бардык баскычтарында биометрикалык идентификациялоону киргизүү;
- аккаунттарды үчүнчү жактарга берүүгө толук тыюу салуу;
- чет өлкөлүк жумушчу күчүн тартууга тыюу салуу;
- Жол кыймылынын эрежелеринин сакталышын туруктуу көзөмөлдөө.
Шаар прокуратурасынын өкүлү бардык кызматкерлердин укуктук макамы мыйзамдуу болушу керектигин эскертти. Кеңешменин катышуучулары платформалардын ички регламенттерин кайра карап чыгуу жана коопсуздук эрежелерин бузууга түрткү берген "тез жеткирүү" стимулдарын жоюу маселесин да талкуулашты.
Айдын Кабдулдинов эгер системалуу өзгөрүүлөр болбосо, полиция департаменти кошумча ченемдик жөнгө салуу чараларын демилгелей турганын айтты.
