Мамлекеттин бюджетинин негизги киреше агымын КНС түзөт - 32%
2022-жылдын 8 айында Мамлекеттик салык кызматы мамлекеттик бюджетке 99 млрд 961.4 млн сом салык жана төлөмдөрдү жыйнады. Бул тууралуу МСКнын маалымат кызматы билдирди.
Белгиленген план 1 млрд 445.5 млн сомго ашыгы менен аткарылган жана келип түшкөн каражаттын негизин КНС түзгөн.
Салык жана төлөмдөрдү жыйноо түзүмү: КНС – 32%, Кумтөрдөн келип түшүүлөр – 21.9%, пайда салыгы – 16%, киреше салыгы – 10.7%, акциз салыгы – 6.6%, сатуу салыгы – 4%, салыктын башка түрлөрү – 8.8%ды түзгөн.
2021-жылдын ушул мезгилине салыштырмалуу 33 млрд 829.4 млн сомго көп салык жыйналган.
Салык кызматы тарабынан башкарылуучу мамлекеттик бюджеттин кирешелеринин негизги үлүшү жыйымдардын жалпы көлөмүнүн 32% өлчөмүндө кошумча нарк салыгы (КНС) боюнча келип түшүүлөрдүн эсебинен камсыз кылынган.
Буга чейин Economist.kg кабарлагандай, Мамлекеттик салык кызматына 2022-жылы 155.6 млрд сом салыктарды жана 41.7 млрд сом камсыздандыруу төгүмдөрүн чогултуу боюнча тапшырма коюлган.
