IFC «Демир Банк» аркылуу КРда чакан жана орто бизнести насыялоого 10 млн доллар бөлөт
Эл аралык финансы корпорациясы (IFC) «Демир Кыргыз Интернэшнл Банк» ЖАКсына 10 млн доллар өлчөмүндө сом менен насыя берет. Эки финансы институту тең келишимге кол койгонун КРдагы Өнүктүрүү боюнча өнөктөштөрдүн Координациялык кеңеши билдирди.
Аталган каражат бизнесин өнүктүрүү үчүн насыя ала албай кыйналып келген чакан ишкерлерге берилет. «Демир Банк» түшкөн каражатты кичи жана орто бизнести насыялоонун көлөмүн көбөйтүүгө жумшайт. Каржылоонун 25%га жакыны аялдар башкарган ишканаларга бөлүнөт.
IFC чакан жана орто бизнес Кыргызстандын ИДПсынын 42%ын түзөөрүн, бирок алардын көбү банктык каржылоону алууда тоскоолдуктарга туш болуп жатканын белгиледи. Бул ишканалар үчүн кредиттик дефицит болжол менен 1.4 млрд долларды түзөт.
Ошондой эле IFC “Демир Банкка” ишкер аялдарга багытталган продукттарды жана кызматтарды иштеп чыгууга жардам берет.
IFC менен аталган коммерциялык банктын кызматташтыгы Эл аралык Өнүктүрүү Ассоциациясынын (ЭӨА) Жеке секторду колдоонун механизмдерин улуттук валютада каржылоо программасынын алкагында колдоого алынат.
