Улуттук банктын божомолунда жыл аягына чейин ИДПнын өсүшү 4.2% деңгээлинде болот
Кыргызстандын ИДПнын реалдуу өсүшү 2022-жылдын аягында болжол менен 4.2%ды, ал эми Кумтөрдү эсепке албаганда 3.7%га жакын болушу күтүлүүдө. Орто мөөнөттүү мындай божомол Улуттук банктын үстүбүздөгү жылдын II чейрегине карата акча-кредит саясаты боюнча отчетунда айтылды.
Регулятор Кумтөр кениндеги өндүрүштүн өсүшү 2021-жылдагы өндүрүштөн жогору болот деп болжолдоодо.
Мурдагы отчетко салыштырмалуу ИДПнын болжолу жогору өсүү жагына өзгөрдү. Бул II кварталда соода, кызмат көрсөтүү тармактарындагы өсүү темпи, продукцияларга салынган таза салыктар өткөн чейректеги күтүлгөн жыйынтыктан жогору болгондугу менен түшүндүрүлөт.
«2023-жылы ИДПнын реалдуу өсүү темпи Кумтөрдү эсепке албаганда 3.6%дын тегерегинде, ИДПнын өсүшү 3.4%дын тегерегинде күтүлүүдө. 2022-жылы инфляция жылдын акырына карата 15.5%дын тегерегинде, ал эми орточо жылдык инфляция 14%дын тегерегинде болору күтүлүүдө. Инфляциянын деңгээлинин орто мөөнөттүү максаттуу көрсөткүчкө кайтып келиши 2024-жылга жакын болот», — деп айтылат Улуттук банктын отчетунда.
Ал эми КРдагы инфляция тууралуу айта турган болсок, Евразия өнүктүрүү банкынын (ЕАӨБ) талдоочулары да 2022-жылдын аягында анын деңгээли 15.3%га жетет деп болжолдошкон эле.
"КРнын керектөө куржунунда нан жана дан азыктарынын үлүшү 15%ды түзөөрүн эске алганда, 2022-жылдын күз-кыш айларында инфляциянын өсүшү ылдамдашы мүмкүн. Дүйнөлүк энергетикалык рыноктордо баанын жогору болушу жана дүйнөлүк ташуу чынжырчасынын үзгүлтүккө учурашы буга кошумча түрткү берет. Инфляция болжол менен жыл аягына чейин 15.3%га жетиши мүмкүн", – дешкен ЕАӨБдүн талдоочулары.
