КРнын экономикасы учурдагы кырдаалдарга карабастан быйыл 3%, келерки жылы 3.5%га өсөт - АӨБ
Үстүбүздөгү жылдын жети айындагы туруктуу өсүүнүн жана өкмөттүн кризиске каршы планынын 2.5% деңгээлиндеги болжолдонгон шартында КРнын экономикасы ИДПга карата 2022-жылы 3%, 2023-жылы 3.5%га өсөт. Бул тууралуу бүгүн, 21-сентябрда Азия өнүктүрүү банкынан (АӨБ) билдиришти.
АӨБдүн талдоочуларынын берген отчетуна ылайык, 2022-жылдын жети айында КРнын экономикасы 7.7%га өстү. Өнөр жай өндүрүшүнүн өсүшү 17.8%ды түздү, бул негизги металлдарды жана даяр металл буюмдарын чыгаруу 45.6%га, жыгач жана кагаздан жасалган буюмдарды чыгаруу 27.5%га, тамак-аш жана тамеки өнөр жайында 12.9%га өсүүнүн эсебинен камсыздалган.
2022-жылдын жети айында жылдык инфляция азык-түлүккө жана энергетикага дүйнөлүк баалардын өсүшүнөн, ошондой эле март жана апрель айларында улуттук валютанын АКШ долларына карата арзандоосунан улам 13%ды түздү. Быйыл инфляция жогорку деңгээлде сакталып, бирок 2023-жылы бир аз басаңдашы күтүлүүдө.
2022-жылдын жети айында кызмат көрсөтүүлөрдүн (тейлөө тармагы) көлөмү 3.5%га өстү, өлкөгө 3.8 млн турист келгендигинин эсебине тамак-аш жана мейманкана секторундагы өсүү 12.5%ды түздү. Буудай жана арпа өндүрүүнүн өсүшүнүн эсебинен айыл чарба продукциясынын көлөмү 8.4%га көтөрүлсө, инвестицияларды көбөйтүүнүн эсебинен курулуш 3.6%га өстү.
Бул талдоодогу келтирилген маалыматтарга ылайык, Россиянын Украинага басып кириши жана андан кийин Россия Федерациясына каршы санкциялары КРнын акча которуу, соода, инвестиция жана туризм аркылуу тыгыз экономикалык байланыштарын эске алганда, өсүү перспективаларын кыйла эле басаңдатуусу күтүлөт.
