Президент Садыр Жапаров өкмөт Кыргызстанда руданы казуудан баштап, металл буюмдарын чыгарууга чейин толук кандуу металлургиялык өндүрүш чынжырын түзүүгө ниеттенип жатканын айтты.

Жапаров бул тууралуу бүгүн Бишкекте өтүп жаткан биринчи элдик курултайда билдирди. Президенттин айтымында, келечекте өкмөт сырттан металл сатып албастан, өзүнүн темир кендерин пайдаланып, темир рудасын кайра иштеткен жана темир буюмдарды чыгарган заманбап заводдорду курууну көздөп жатат.

“Миллиондогон акчабыз жыл сайын темир сатып алуу үчүн эле өлкөдөн чыгып кетет. Бул каражатка темир рудасын кайра иштетүүчү заманбап завод кура алсак, анда өлкөбүздөн ири каражаттардын агып кетүүсүн токтотуп эле тим болбостон, экспортко чыгарып, мамлекеттин казынасына киреше алып келебиз», – деди Жапаров.

Курула турган металлургиялык заводдордун продукциясын экспортко гана чыгарбай, ошондой эле өлкөнүн ичинде — темир жолдорду, гидроэлектростанцияларды курууда жана башка курулуштар үчүн пайдалануу сунуш кылынууда.