Транспорт министри Тилек Текебаев Жалал-Абад облусуна жасаган иш сапарынын алкагында Сары-Челектин жолунун абалы менен жеринен таанышты. Бул тууралуу министрлик билдирди.

Министрдин айтымында, өлкөнүн туристтик потенциалын өнүктүрүү үчүн биринчи кезекте инфраструктураны жакшыртып, жаратылышы керемет жети дубанды көрүүгө келген конокторго жакшы шарт түзүү маанилүү.

«Мындан улам, мамлекет жетекчисинин демилгеси менен айыл аралап, асман тиреген тоолордун койнунда мелтиреп жаткан көлүбүзгө барчу жолго асфальт төшөө пландалууда», - деди Текебаев.

Жергиликтүү калк менен келген коноктордун каалоосун эске алып, өзгөчө коргоодо турган кереметүү Сары-Челек коругунун жолун оңдоо мерчемделүүдө.