Министр Э.Ахунбеков суткасына 2800 литр сүт өндүргөн фермага барды
Бүгүн Министрлер Кабинетинин Төрагасынын орун басары – Суу ресурстары, айыл чарба жана кайра иштетүү өнөр жайы министри Эрлист Акунбеков Чүй облусунун Сокулук районунда жайгашкан “Дана Агро” асыл тукум мал чарбасынын ишмердүүлүгү менен таанышты.
Иш сапардын алкагында министр чарбанын өндүрүш процесси, малдын асыл тукум курамы жана сүт өндүрүү көрсөткүчтөрү менен жеринен таанышты. “Дана Агро” чарбасы 2015-жылдан бери асыл тукум мал чарбачылыгын өнүктүрүү багытында иш алып барып келет.
Учурда чарбада жалпысынан 142 баш ири мүйүздүү мал багылууда. Алардын ичинен 57 баш торпок, 7 баш музоо бар. Чарбда негизинен симментал, голштино-фриз жана швиц породасындагы асыл тукум малдар багылат.
Фермада өндүрүлгөн сүттүн көлөмү суткасына орточо 2 тонна 800 литрди түзөт. Өндүрүлгөн сүт жергиликтүү кайра иштетүүчү ишканаларга, атап айтканда "Кантсүт" жана "Жайылсүт" ишканаларына өткөрүлөт.
Министр Эрлист Акунбеков асыл тукум мал чарбачылыгын өнүктүрүү айыл чарба тармагындагы маанилүү багыттардын бири экенин белгилеп, мындай чарбалардын ишмердүүлүгүн колдоо, өндүрүштү көбөйтүү жана сапаттуу айыл чарба продукциясын чыгаруу өлкөнүн азык-түлүк коопсуздугун камсыздоодо чоң роль ойной турганын айтты.
