Кыргызстандын аэропортторунун базасында комплекстүү бонд аймактары ачылат
Кыргызстандын аэропортторунун базасында комплекстүү бонд аймактары ачылат. Бул тууралуу «МЭА» ААК башкы башкармалыгын төрагасы Манас Самидинов эл аралык электрондук коммерция форумунда айтып берди.
Такталгандай, кеп аэропорттордо комплекстүү бонд зоналарын ачууну пландаштыруу жөнүндө болууда – бул биринчи кезекте «Манас» эл аралык аэропортунда, ал эми келечекте «Ош», «Ысык-Көл» жана «Каракол» эл аралык аэропортторунда ачууну максат кылууда.
«МЭА» ААК динамикалуу өнүгүп келе жаткан компания, анын максаты региондук жана эл аралык рынокто авиациялык кызматтарды көрсөтүүдө лидер катары консолидациялоо.
2022-жылдын жыйынтыгы боюнча «МЭА» ААК өндүрүштүк көрсөткүчтөрү төмөндөгүлөрдү түздү:
• каттамдардын саны: 41 миңден ашык;
• жүргүнчүлөрдүн саны 5 миллиондон ашык;
• жүк ташуунун көлөмү 38 миң тонна.
«Аталган көрсөткүчтөрдүн баардыгы тынымсыз өсүүнүн жана анын натыйжасында өлкөнүн аэропорттору өнүгүп жатканын көрсөтүп турат. Каттамдардын, жүргүнчүлөрдүн жана жүктөрдүн агымынын санынын өсүү динамикасы ар кандай чөйрөлөрдө аэропорттордун инфраструктурасын өнүктүрүү стратегиясын түзүүгө мүмкүндүк берет. Учурда аймактык аэропорттордун инфраструктурасын жаңылоо жана куруу активдүү жүрүп жатат. Мисалы, «Каракол» аэропортунда учактардын бардык түрлөрүн, анын ичинде жүктөрдү да кабыл алуу үчүн учуу тилкесин узартуу иштери жүрүп жатат», - деди Самидинов.
Аэропортторубузда бонд зоналарынын ачылышы жаңы инвестицияларды тартып, өлкөбүздүн экономикалык өсүшүнө түрткү болот. Бул долбоор жаңы жумуш орундарын түзүп, ишкерлерди тартууга шарт түзүп, жалпы Кыргызстандын өнүгүшүнө салым кошот.
Эң негизгиси, бул интеграцияланган бонд зонасы товарды импорттоо менен гана чектелбестен, Кыргызстандан товарларды жана жүктөрдү экспорттоого мүмкүнчүлүк түзүп, дүйнө жүзү боюнча экспортко жол ачарын белгилегим келет.
Интегралдык бонд зонасын түзүү – бул дагы бир жүк терминалын куруу эле эмес, бул аймактагы ири логистикалык борборду түзүүгө болгон биринчи кадамыбыз.
