Европа болот импортуна 50 пайыз бажы салыгын киргизет
Евробиримдик өзүнүн болот эритүү тармагын узак мөөнөттүү коргоо үчүн дүйнө жүзүнөн импорттолгон болотко 50% бажы салыгын киргизүүнү көздөп жатканын Financial Times басылмасы жазып чыкты. Брюссель өкүлдөрүнүн биринин айтымында, Европанын болот өндүрүүнү сактоонун мындан башка жолу жок. Антпесе ЕБ “болот эритүү өнөр жайынан кур жалак калышы” толук ыктымал.
Учурда Евробиримдикте 2018-жылы киргизилген 25% пошлина бар жана анын мөөнөтү 2026-жылы жайында бүтөт. FTнин маалыматы боюнча пошлинасыз квоталарды жогорулатуудан улам бул чаранын натыйжасы жакшы болгон эмес.
Мындан сырткары Евробиримдик болоттун жылдык импортун 18 млн тоннага чейин азайтууну пландаганы айтылат. UK Steel ассоциациясынын башкы директору Гарет Стейс ЕБдин мындай планы Лондонду тынчсыздандырарын айтат. Себеби Англия өндүргөн болотунун 80 пайызын Европага экспорттоп келген.
