"Газпром Кыргызстанга" Россия газы үзгүлтүксүз берилет
Энергетика министри Таалайбек Ибраев ведомствонун коллегиялык жыйынында “Газпром” ПАКынын директорлор кеңешинин төрагасынын орун басары Алексей Миллер менен болгон эки тараптуу сүйлөшүүсү тууралуу айтып берди.
Т.Ибраевдин билдиришинче, А.Миллер менен менен жолугушууда алар Кыргызстан үчүн “Газпромго” капиталдык салууларды жогорулатууну макулдашышкан.
“Ал мага газ жеткирүү үзгүлтүксүз болуш үчүн эмне кылуу керектигин сурады. Мен ал үчүн коңшу мамлекеттерден Кыргызстан керектеп жаткан көлөмдөгү газды үзгүлтүксүз кое берип турууну сураныш керектигин айттым. Ал “Бул маселе Казакстан, Өзбекстан деңгээлинде чечилет. Мен алардан бул боюнча өтүнөм, анткени ал жакта менин туунду ишканаларым бар. “Газпром Кыргызстан” бул менин ишканам жана анда эч кандай үзгүлтүк болбошу керек” деди”,-дейт Т. Ибраев.
Министр экинчи маселе Миллер менен капитализация тууралуу болгонун билдирди. “Мен объективдүү, субъективдүү себептерден улам капитализация көлөмү бир аз азайгандыктан аны көлөмү мурдагыдай болсун үчүн 1,5 миллиарддай рубль сурадым. Ал бул боюнча тапшырма бергенин жана ал аткарыларын айтты”,-дейт министр.
